Nazirlik tərəfindən əsas fəaliyyət istiqamətlərindən olan məhkəmə qərarlarının vaxtında tam icra olunmasına nəzarət edilir, icrası uzun müddət davam edən aliment, pul tələbi işlərinin icrasında yaxından iştirak edilir. Nazirliyin İcra və probasiya şöbəsinin və İstintaq bölməsinin əməkdaşları birlikdə icra sənədi üzrə icradan  yayınan borclular barədə profilaktik tədbirlər görmək məqsədilə yerli icra və probasiya qurumlarında tədbirlər keçirirlər. Növbəti tədbir sentyabrın 11-də Kəngərli Rayon İcra və Probasiya bölməsində təşkil edilmişdir.

Tədbirdə bölmənin icraatında olan aliment və pul tələbinə dair icra sənədləri üzrə icradan yayınan borclularla profilaktiki söhbətlər aparılmış, onlara icra sənədi üzrə tələblərin vaxtında yerinə yetirilməməsinə görə hansı məsuliyyətə cəlb oluna biləcəkləri barədə qanunvericiliyin tələbləri  izah edilmişdir.

Bələdiyyələrin kənd təsərrüfatı təyinatlı torpaqlarının icarəyə verilməsi zamanı qanunvericiliyin tələblərinin gözlənilməsi nəzarətdə saxlanılır. Bu məqsədlə Naxçıvan Muxtar Respublikası Ədliyyə Nazirliyinin, Daşınmaz Əmlak və Torpaq Məsələləri üzrə Dövlət Xidmətinin əməkdaşlarından ibarət yaradılmış işçi qrup, Şərur Rayon İcra Hakimiyyətinin nümayəndələrinin də iştirakı ilə  rayon ərazisində fəaliyyət göstərən yerli özünüidarəetmə orqanlarının mülkiyyətində olan kənd təsərrüfatı təyinatlı torpaqların qanunvericiliyə uyğun icarəyə verilməsinin monitorinqini aparmışlar. İşçi qrup  bələdiyyə sədrləri ilə görüşmüş və icarəyə veriləcək torpaq sahələrinə baxış keçirmişdir. Monitorinq zamanı qeyd olunmuşdur ki, muxtar respublikamızda aqrar sahədə həyata keçirilən islahatlar kənd təsərrüfatının inkişafına, kəndlinin həyat şəraitinin yaxşılaşmasına səbəb olmuşdur. Ölkəmizdə bələdiyyə qanunvericiliyinin təkmilləşdirilməsi nəticəsində  bələdiyyə torpaqlarının fiziki və hüquqi şəxslərə icarəyə verilməsi və istifadə imkanları genişləndirilmişdir.

Dövlət orqanları ilə kütləvi informasiya vasitələri arasında səmərəli münasibətlərin qurulması çağdaş dövrün əsas tələblərindən və hüquqi dövlət quruculuğunun vacib elementlərindən biridir. Dövlət orqanları qanunla müəyyən edilmiş qaydada ictimai xarakterli informasiyaya sərbəst və maneəsiz çıxış imkanlarının yaradılması vəzifəsini yerinə yetirirlər. İnformasiya texnologiyalarının sürətli inkişafı dövlət orqanlarının da zamanın tələbləri ilə ayaqlaşmasını şərtləndirir. Belə ki, zamanla insanların informasiya almaq imkanları dəyişir. Əvvəllər televiziya, qəzet və jurnallar informasiya mənbəyi hesab olunurdusa artıq insanların əksəriyyəti internet resurslarının imkanlarından yararlanmağa çalışırlar.

Ədliyyə sahəsində dövlət siyasətinin formalaşmasında iştirak edən və bu siyasətin həyata keçirilməsini təmin edən nazirlik hüquqi maarifləndirmə işində önəmli rola malikdir.